ريشة مُجتمع الأدب العربيّ
مقالات مشابهة
هو شوي شوي و بصعوبة مسك معلقة .. ما كان في صحن .. أو كان في صحن جواه أكل بس هو بعده عنه قد ما قدر ورجعه للي قدم له إياه .. حكا له مش ماكل .. ! وما تحلم آكل ..
كانوا طول الليل موقفينه برا لحاله.. برد الصحرا وجعه كتير ..بس ما حدا حس فيه ..
آه صحيح , المعلقة ما دخلت تمه .. كاسة بلاستيك بس فيها مي حط فيها ملح وحركهم .. كَتّر الملح .. كل يوم بزيد كمية الملح ..
احنا لما ناكل ع طرف لسانا شي مالح بنرميه ع طول وبقشعر بدنا وبنكشر وبنشرب مي صافيه منعشة لنضيع ذرات الملح من لسانا..
هو ما كان متلنا .. هو شرب كاسة مي وملح كاملة بإرادته تماماً.. ما حكا شي بس ” بسم الله ” ..
أحياناَ بكون قدامنا لحم و رز و سلطات بكل الألوان و ألبان وشوربات ومخللات وروائح البهارات و نكهة الأكل الي حوالينا بتفتح النفس .. مع كل هادا ما بنتذكر نعم الله و بننسى نحكي ” بسم الله ” .. !! شو عليه عادي ! بس ما بننسى ناكل منيح لنشبع ..!
هو صرآحة مستغني كمان عن ” المي وملح ” ومش فارقين معه لولا إنه بس ما بده معدته تعفن و أجهزة جسمه يوقفوا .. حتى سمعت إنهم منعوا عنهم الملح ..!
بده يروِّح .. بده يتحرر …عَ فكرة .. كمان والله صدقوني عنده بيت .. و عنده صحاب وناس بحبوه يابيييي شو مشتاقلهم ومشتاقينله لو تعرفوا بس ..
عنده ولاد , إله كزا سنة ما شم ريحتهم و حضنهم وما حط كف ابنه الصغير جواة كفه ودفاه له إياه وإله زماااان كتير ما رفع بنته الصغيرة فوق راسه وحسسها إنها ملكة ..! ♥
هو كمان بحب يروح ويغير جو ويعيش ويشتغل ويتعب ويبني حياته خطوة خطوة مش يضله مكانه , كل يوم شعره سودا بتبيض من وجع قلبه ! بحب يكون جنب أهله لما بتزعلهم الدنيا ويحط أمه وأبوه في عيونه ..
هو كمان ما بحب يترك مرته لحالها .. بده يربي معها ولادهم ..بده يحقق كل الي خططوا له .. شو بحس بالعجر والوجع لما بحس الزعل والقهر بصوت مرته و بكون نفسه يسألها شو في مين مضايقك ؟ بس بسكت لأنه عَ الفاضي ما راح يغير شي وهو بهالمكان والعيشة .. كان بده يحميها ويساندها وما يخلي مرته تحتاج حد غيره .. بس ما قدر ..
اليوم هو 16 لإضراب الأسرى الإداريين عن الطعام .. شو يعني أسير إداري فلسطيني ؟ يعني ما في تهمه واضحه لإله وملف اعتقاله ما بقدر يشوفه المحامي ولا غيره ..ما بعرف الأسير بحاله ليش هو بالسجن ! بس بضل يتمدد 6 أشهر إداري .. شهر ورا شهر وشهر .. قد ما بدهم يعني بخلوه …
في كتير زوجات أسرى إداريين بتأملوا إنه يطلع الأسير من السجن , فبجهزوا البيت وبغيروا عفش البيت وبعزلوه و بشتروا أواعي وحتى النفسيات بتتغير والكل بفرح زي العيد ,لما بيجي آخر يوم إله وانتهت المدة ببعتوا له ورقة تمددت كمان كم شهر ..و هكذا .. كم من قلب حرقوا فكركم ؟! .. لحالكم قدروا الخيبة للأسير و أهله ..
لهيك هو وغيره حكا خلص لحد هون وبكفي .. ما بدنا حدا يفاوض علينا و كلام فاضي .. معانا كرامة ومعده .. هدول أسلحتنا .. بدنا نتحرر فيهم ..
بدنا نموت أحرار بس ما بدنا نعيش بذل ..
صدقوني بالنسبة لحياته بالسجن كل وجع الجوع والعذاب بهون .. بيتلوى من الوجع صح .. بيتطلع عَ انعكاس وجهه في المراية كل يوم بشحب وجهه وبنحف كيلو ورا كيلو وبحكي معلش .. يمكن يصرخ من الوجع .. بنام ووصوت أنين ومواساة لحاله ..بس في شي جواته أكبر أقوى إنه ربنا حينصره .. حيعوضه كل خير .. في سبيل الله كل شي بهون كل شي ..
16 يوم وهو بصرخ وفي ناس بيطلعوا عليه بعملوا حالهم مش شايفينو ما بدهم يسمعوا شي .. حتى ما بفكروا ..ما دخلهم شو يعملوا له يعني خليهم بهمهم بحضروا مسلسل أجنبي
وبعيطوا عليه ..
16 يوم ما حط لقمة بتمه – مش من الصبح – .
16 يوم وامه قلبها عليه خايفة يرجع لها بالإسعاف ميت مش عَ الأكتاف متحرر ..
16 يوم كل يوم بحس انه كبر سنة كاملة ..وانه برجع طفل عاجز عن انه يخدم حاله ..
16 يوم ما زهق .. ولا يئس .. ولا حكا بكفيني .. ولا استسلم ..
16 يوم وهو بينضغط عليه وبيُستفز ليتخلى عن إضرابه وهو مكمل هالطريق بعناد ..
16 يوم وهو شبعان كرامة ..
انتقِ أوقات الاستجابة واحتضنهم بالدعاء ..
كلمة قالتها زوجة أحد الأسرى المضربين ” إن لم تأتوا وتشاركونا فعاليات التضامن لاتحضروا للتهنئة حين ينتصروا ”
“سئمنا العد، وما سئموا الجوع في سبيل الكرامة!”
غيداء القواسمة
952014
“اللهم فك أسر المأسورين الفلسطينيين في مغتصبات بني صهيون
اللهم من عاداهم فعاده ….ومن آذاهم فآذه ..ومن ناصرهم فانصره ….وللحق سدده ..
اللهم احفظ عليهم دينهم .. وأعراضهم ..وأنفسهم ..
اللهم إنهم ضعفاء فقوهم .. مظلومين فانصرهم .. مبتلين فثبتهم .
اللهم احفظهم من بين أيديهم وعن أيمانهم وعن شمائلهم ومن فوقهم ونعوذ بعظمتك أن يغتالوا من تحتهم .
اللهم إنهم عبادك ..خرجوا في سبيلك وابتغاء مرضاتك .. اللهم فمنَّ عليهم برحماتك، وأنزل عليهم السكينة والصبر على الجوع واجعل من إضرابهم نصراً على أعدائهم..
وثبتهم يا رب العالمين” ..
آآميـــــــــــــن
#اضراب_الأسرى_الإداريين
#ثورة_الحرية_2014