ريشة مُجتمع الأدب العربيّ
مقالات مشابهة
عارف شعور..
إنك تدور على اشي مو موجود..
وللحظة تحس انو الدنيا بلا حدود
وإنو بإيدك صار كل الوجود
شعور ما ح يعود !
عارف شعور..
إنك متل شجرة بعز الخريف
متل ورقة مرمية ع جنب الرصيف
متل سفينة تايهة جوا إعصار عنيف
شعور مخيف !
عارف شعور..
واحد أعمى عايش الدنيا بظلام
واحد كل مالو بيرجع لورا ومو قادر يمشي لقدام
واحد مقضيها نوم وبيصحى لحتى يرجع ينام
شعور استسلام !
عارف شعور..
رجل ماشي بوطنه ومو حاسس بأمان
حدا نفسو يرجع متل ما كان برمضان
أب ما معو يعطي ابنو مشان يروح عالدكان
شعور حرمان !
عارف شعور إنو الدمعة بعينك مو قابلة تنزل
وإنو الغصة بقلبك ما عم بتروح
وإنو الوجع عم يدخل بروح الروح
شعور إنو ما عاد بدك تمشي ع قافية
وتصير تكتب وقلمك يسمع
وتضيع بين حالك وبينك
وتحس إنو الدنيا كلها هموم
وحكيك يقلب حكي واحد مفصوم
والناس تقرأ وتقول مالو انهبل
وانت ولا كأنك هون !
عقلك مو معاهم…عقلك معاك
بيفكر وبياخدك من هون لهناك
مرة ع قلبك…مرة ع روحك
ومرة ع مكان مو متل أي مكان !
شعور إنك ح تفوت بالحيط
وانك رايح من يمين لشمال
شعور إنك ضايع..تايه
شعور إنك مش عارفك..ولا شايفك
شعور إنك مش سائل ولا حاسس ولا مهتم !
فرصة تصحى..هادا مش شعور !
هادا اشي بيقتل بروحك الأشياء الحلوة
بيسحب من قلبك كل اشي غالي
وبيخربش بحياتك على كيفو
الا لما توقفو..لازم توقفو !
لازم تصحصح..
خد نفس من جوا جوا
وقول ” يا رب” ده عنك مش بعيد .. ~
يا رب.. 🙂
يا رب ^^”
# جميلة ..بل رائعة .
بورك اليراع
أشكرك جدا ^_^
مرورك الأروع 😀
عارف شعور لمَا يموت فيك الاحساس
الاحساس ما بيموت..بس بيتخبى ~